متى بخذ الليسن؟؟

++ الإستيقاظ في الصباح الباكر يشعرك بأهمية اليوم..

وأن يومك لن يضيع بلا فائدة..

..

>>> واعية متأخره اليوم.. والوالده عاطيتني أكبر طاف..

ليش؟؟

عسب أفهم أنها زعلانه مني..

..

++ أحلى شئ تقوم الصبح وما يكون عندك شئ تسويه..

يالس في البيت.. تصفي ذهنك.. مع كوب نسكفيه يعدل مزاجك..

..

++ والله لو كنت أدري أن السالفة فيها مذله ما فكرت في الموضوع..

فتحت ملف في المرور على أساس أخذ الليسن..

من شهر 10 ولحد ألحينه مغرزه:(

الصراحة والصراحة راحه أني مب محتاجه له..

مير غيرتي من خواتي اللي أكبر مني..

خذت أختي أول شئ.. ما قلت شئ لكن بعد ما خذت أختي الثانيه الليسن قلت لنفسي أنتي شو ناقصج بعد خذيه خخخخ

"الحشره مع الجماعه عيد"

لكن صدق أنا محتايه له.. يعني أغبش من الصبح للجامعة مع أن كلاساتي تبدأ من الساعه 9 ومرات 11

يا حبيبي ما شئ شغل !!

..

النتيجة الوحيده اللي صارت من هذي الغبشه للجامعة وأوصل البيت الساعة 7:30 المسا

أن وزني زاد :(

والسبب من كثر ما أصرط في هذي الجامعة..

لازم من قلة الشغل..

فاتحه هذا الاب توب وأطقطق بأصبوعي وأصرط من الصوب الثاني..

..

خيبه جني طرت عن موضوعي لووول

المهم..

أمس رحت أدرب.. يحليها وايد طيبه المدربه..

مير سيارتها ما حبيتها.. منو المينوون اللي يدرب ع الساعة 5 العصر..

حتى التكيف فيها مب شغال ولا حتى راديوا.. وهي قاعده تحت ظلة مع هبووب لنسيم خفيف مع أنه لاهوب..

بس أحسن من لا تنطبخ في السياره..

يخربيتها من سياره..

..

ولا الأحباط أخويه أونه ايد فرحانه بتاخذين الليسن..

فيعني المسألة تحولت لسالفة عناد وتحدي..

وأنا ما أحب حد يتحداني.. راسي يابس..

..

++ عندي تراي يوم الثلاثاء أن شاء الله أنجح..