مني ومنااك

ليش الواحد يصدموونه من على بكرة الصباح..

استاذ الفكر عطانا درجات الميدترم..ويخربيتهاا من درجه

والله يستر كم يبت في السعي..أستحيت أتخبره..

مستحيه من الدرجه تطلع زفت أو حتى راسبه :(

الله يستر بس ما نرسب فيه..

أفكر أحرمن فيه ولا يعطيني D في أخر الكزرس وخلاف تنزل المعدل لي مب ناقصه الصراحه!!

...

..

من قبل شوي كان عندي ميدتيرم "سرفي أوف برتش" وحليلي أمس دارسه على أساس درجة كاملة أن شاء الله

مير شوي خانتني ذاكرتي والله يستر :(

...

..

اليوم الصبح قلت بخذ لي كروسان من الرباعية قلت بغير يمكن أحلى من المبنى اليديد

لكن نو وي..مب حلوه بالمره

كروسان المبنى أحس فيه طعم بلاستيك ومرات يكون شارب زيت من الخاطر..

حتى أذكر كلت مره وحسيت بتيني جلطة في القلب >> على كيفي جلطة مره وحده خخخخ

عيشتهم بالمره مب حلووه >> أنا وحده بطينيه ما أقدر أصبر عن الأكل

يعني لو كنت يوعانه ودخلت الكلاس بسطل لازم أترس بطني شوي وخلاف بصير التركيز عشره على عشره

...

..

ناس ما أعرف كيف تفكر..

نحن نروح الجامعة عسب ندرس..

وناس تروح الجامعة على أساس أنها رايحه عرس..

متفيجين من الخاطر لوووول

ما عندي سالفه !!

مساء الخير,,

أو ممكن نقول صباح الخير,,

يعني أنت اختار اللي يناسبك >> ما شيء شغل لووول

أنا بصراحة كرهت حياتي الجامعة والسبب هذا الجدول الأرفف..

يعني اللي يعتمد على المواصلات من طرف الجامعة ما عنده سالفه << هذي أنا : (

يعني المفروض تكون جاهز على الساعة 6:15 الصبح يعني أنت ما تعرف متى بشرف الباص..يتأخر ما يتأخر هذي مشكلتك وبس..ما يصير تشتكي عليه..عليك تنتظر وبس..

يا حبيبي!!

وبيطلع مرتين من الجامعة الباص الأول بيتحرك 2:30 أما الثاني بيطلع 6:30

يعني اللي قوم مناطق نائية بيتعذبون من الخاطر أو اللي تكون أخر بنت في الباص توصل..

هذي شو حياتهاا!! يعني لازم توصل كل البنات بعدين هي تنزل؟

...

..

الحل بالنسبة لي تاخذ الليسن لكن ما ادري كيف مره دار نقاش على سالفة الليسن مع قرووب البنات اللي وياايه

كل وحده تشوف غير الثانيه خخخخ

والله لو تشووفهن يقول بحلن قضية السلام في فلسطين..

المووهيم..

فكرة البنت تاخذ ليسن شوي غير محببه من جهة البنت نفسها..

يعني البعض منهن يريدن الليسن لكن ممكن تكون الحكومة ما موافقة عليه خخخ

لكن أن يقولون لها روحي خذي الليسن أحسن لج وتقول هي لا ما أريد !!

غريبه صراحة!!

هذي الفئة من البنات حجتها حبتين اقتنعت فيهاا..

أونه على أساس لو خذت الليسن الريال بسوي لها طاف..

وكل شيء تبااه تقدر تيبه بروحهاا..

يعني لو مره حبت تتدلع على الريال مثلاً أغراض ناقصتني ممكن تشلني السوق,,

مستحيل يشلها أونه عندج سيارتج وروحي أنا مب متفيج.. فئة من الشباب تسوي هذي الحركة لدرجة أن حتى مسؤوليات عياله يخليها على الحرمه..يعني يتخلص من بعض المسؤوليات اللي على ظهره..

بس طبعاً مب الكل لأن حد منهم بس يوم تكونين في أمس الحايه لا غير وقت ثاني أنا بوديج وين ما تبين..

...

طريقة ثانية ممكن تحطين دريول لكن الكل يعرف الدريول يباله سالفه.. وغير ذلك اذا كان يديد يبالج سنه لحد ما تحفظينه الأماكن..أنا عن نفسي مسألة الدريول غير محبذه عندي..ولا بعد لو تحطين دريوله ما في اشكاليه لكن لي حطيتي دريول يبالج محرم ويااج..يعني سالفتها طويلة..

..

..

وفي الحلقة الأخيرة من هذا الهذرباان أني ما أعرف شو أريد!!

وأكيد أنتوا ما فهمتوا شيء خخخخ

لكن يصير كل اللي أتمناه يتحقق؟؟

حال دنياي..

يا من يعانق دنيا لابقاء لهـا ** يمسي ويصبح في دنياه ســفارا
هلا تركت لذي الدنيا معانقةً ** حتي تعانق في الفردوس أبكارا
إن كـنت تبغي جـنـان الخـلـد ** تسكنها فينبغي لك ألا تأمن النارا

الإمام الشافعي

الحمدالله على كل حال

مصيبة القطيعة!! ما أدري على منو طالعة..

لكن الانسان تصيبه "هفـاآت" ويعاف كل شيء..

أمس تخبرني ربيعتي يوم شفتها الصبح عن حلمها أونه حلمت عن النفخ بالصور..

غربية! قلت لها..

لكن يوم رجعت حسبتها في راسي.. يا الله شو كثره مقصرة حق آخرتي..

خذتنا الدنيا ونسيت ولو البسيط أعده حق آخرتي..

...

هذا الاأسبوع جداً مزحومة.. عندنا امتحانات السعي

والأسبوع اللي بعده بيكون المنتصف >> الله يوفق الجميع..

طبعاً من غير الحفلة اللي سويناها وكان السبت دوام على أساس أنه تعويض ليوم الأحد اللي كان قبل العيد..

ولا بعدنا بنداوم"سبتين" >> المثنى من السبت

على أساس اليوم الوطني وعيد الأضحى..

...

من قبل شوي كان عندي كلاس فكر وطبعاً كنت حبتين مسطله

بس من قال تخيلوا تطلعين وأنتي لابسه الماهيو لوووول

عاد أنا هني صحصحت,, فخطر في بالي ليش ما يسون مساق سباحة ^^

جداً الفكره حلوه..

اللي يسمع عندنا بحر عسب نقول بنحتايه>> حدي العين وبس

مير ما تدرون شو اللي يصير خخخ

وين تبين روح قري مكانج..

...

مرت 6 شهور من أخر تراي خذته وطبعاً أكيدين الملف أغلق :(

أنا وين والليسن وين؟؟

بخبركم بعدين عن سالفة الليسن وراي البنات فيه,,

لدرجة أني ساعات أقول ماله داعي لليسن..

أن شاء الله في بوست ثاني بكتبه>> يوم تتفيج العيوز صايره كسوله